വെട്ടിയിട്ട മരത്തിന്‍റെ
മണ്ണില്‍ ബാക്കിയായ വേര്.

വരണ്ടു പോയ പുഴയിലെ
കുണ്ടില്‍ ഒഴുക്ക് നിന്ന വെള്ളം.

ഇറുന്നിട്ടും ഉണ്മയുടെ
ഓര്‍മ്മ മുറിയാത്ത പൂവ്.

പുലര്‍ന്നപ്പോള്‍ ഇരുട്ട്
കണ്ണില്‍ ചാര്‍ത്തിപ്പോയ രാത്രി

പെയ്തൊഴിഞ്ഞ മഴയുടെ
ചുംബനഛവിയുള്ള കാറ്റ്

ചരാചരങ്ങളുടെ
സ്മാരകശിലകൾ

ഓര്‍മയുടെ പുറംചട്ടയ്ക്ക്
ഓട്ട വീഴരുത്

ഇന്നും നാളെയും തമ്മിലുരസി
ഉതിരുന്ന പൊടി 
ഓര്‍മവാഹിനിക്കുഴലുകളുടെ
സന്ധികളിലടിയും എന്നതുകൊണ്ടല്ല

കുന്നിലോ കുളത്തിലോ മര-
പ്പൊത്തിലോ പോയി
തിരികെ വരാതെയൊളിക്കാന്‍
വെമ്പി നില്‍ക്കുന്നുണ്ട് ചിലര്‍, ഉള്ളില്‍.